تعرف علي أول كمبوند فى التاريخ

اشخاص شاهدوا الموضوع

 

إعداد الباحثة مروة أبو عامر

فى الوقت الذى كان العالم فيه يعانى من الفوضى والبدائية كان المصرى القديم بيخطط ويبنى ويتحضر ويرتقى و فى الوقت اللى كان فيه الأقوام حفاه عراه مشردين فى الصحراء وبيسكنوا الخيام كان المصرى القديم بيعيش فى أرقى المناطق السكنية وبيبنى أحلى وأول كمبوند فى التاريخ

من بين روائع الحضارة المصرية تقف قرية دير المدينة شاهدة على عظمة ورقى الشعب المصرى قيادة وشعبا لتكون بخيراتها وكنوزها خير دليل على تقدم مصر الحضارى ورقيها

بتقع قرية دير المدينة فى البر الغربى فى قلب طيبة العريقة وبيرجع تاريخها لأكتر من 3000 سنة وكانت موطنا للحرفيين المهرة اللى قامو ببناء مقابر وادى الملوك اللى ضم أعظم روائع الحضارة المصرية تلك الروائع اللى لسة بتبهر العالم لحد يومنا هذا

الحكاية بدأت من عند الملك العظيم أمنحتب الأول من الأسرة ال18 اللى أدى إشارة البدء فى بناء أول وأجمل كمبوند فى التاريخ المصرى فى قرية قريبة من معبد هابو والرمسيوم وعلى مسافة 3كم من مقابر وادى الملكات، وأمر بإنها تحاط بأسوار وبوابات تخضع لحراسة مشددة ونظام أمنى صارم ودة لضمان سلامة العمال والحفاظ على أسرار المقابر ومن هنا اتحولت لأول كمبوند سكنى متكامل فى التاريخ 

الكمبوند ينقسم إلى ثلاث أقسام

المنطقة السكنية: ودى بقى بلغ عدد المنازل فيها ل70 منزل ، ومحاطة بسور يبلغ طوله حوالى 131 متر من الشمال إلى الجنوب ، وحوالى 50 متر من الشرق الى الغرب ،ومبينة بالحجر بإرتفاع 150 سم فوق سطح الأرض ، وبيقسمها طريق رئيسى تتقاطع عليه طرق فرعية صغيرة دة غير بقى البوابات والأمن والحراسة

المنطقة الجنائزية: ودى بقى كانت كنز لعلماء المصريات عشان لقينا فيها مجموعة من مقابر العمال الرائعة ورؤسائهم كمان واللى جت غاية فى الروعة والدقة والألوان وأشهرها مقبرة سن نچم ومقبرة باشدو ومقبرة إيرنفر

منطقة المعابد: ودى طبعا متفوتش على المصرى القديم اللى كان بيعمل العظمة دى كلها عشان آخرته فأكيد مش هينسى يعمل جوة الكمبوند أعظم المعابد لخدمة ساكنى القرية من العمال وأجمل المعابد هناك كان بيتكون من معبد حتحور وقاعة آمون وآمون رع وقاعة أوزوريس